مين قال إن النقنقة هتقف ما بينك وما بين هدفك إنك تبقي صحية ورشيقة؟ ده بالعكس تماماً، تناولك للوجبات الصغيرة دي على مدار اليوم هي اللي هتديكي طاقة لليوم، وكمان هتسرع معدل الحرق عندك وتعود معدتك على الأكل بكميات أقل على المدى البعيد. بس قبل ما تفتكري إن دي رخصة للأكل اللامتناهي خلينا نقوللك على وصفات سريعة وخفيفة وصحية، وكمان لذيذة وبسعرات حرارية قليلة.
سلطة الـ"كابريزي" الإغريقية مع لمسة شرقية
المقادير:
-- شرائح طماطم
-- ريحان مجفف
-- توابل مجففة (لو حبيتي)
-- ملح البحر وفلفل
-- جبنة بيضة (أو موتزاريلا لو عايزة طعم مش حادق أوي)
-- خل بلسمي
-- زيت زيتون
-- دبس الرمان
الوصفة دي بقى مزيج منعش من سلطة الـ"كابريزي" الإغريقية مع الجبنة المصرية بالطماطم ولمسة لبنانية بدبس الرمان. قطعي شرائح من الطماطم وحطي قطع من الجبنة براحتك، على حسب اللي نفسك فيه.
رشي بلمستك الشرقية الحلوة شوية ريحان، وتوابل، وملح وفلفل. بس لو نفسك تبقي صحية أكتر حاولي تعودي نفسك على الوصفة من غير الملح، واللي هيسهللك كدة أكتر من ناحية الطعم هما حبة الخل البلسمي اللي هتزوديهم على السلطة مع دبس الرمان وزيت الزيتون.
وصفة بسيطة وسهلة التحضير مش هتاخد في إيدك خمس دقايق!
لو نفسك في حاجة حلوة وصغيرة ومتاخدش أي مساحة في شنطتك وانتي بتخلصي مشوايرك حلك عندنا في المكسرات المغطاه بالعسل. ناس كتير أوي مبتقدرش الفوائد اللي موجودة في المكسرات مع إنها مليانة أوميجا-٣ وفيتامين E، إحنا بقى جبنالك وصفة بتوفرلك القيمة الغذائية دي، وعنصر الحلاوة اللي فيها من العسل هيخليكي تبعدي عن البدائل المسكرة الغير صحية.
المكسرات المغطاه بالعسل
المقادير:
-- كبشة مكسرات من غير نكهة (لوز، وكاجو، وعين جمل)
-- معلقة عسل كبيرة
-- سكر فانيليا
في طبق غويط، اخلطي العسل كويس مع سكر الفانيليا. العسل ده بيساعد على تعديل مستوى السكر في الدم وبيساهم في نمو البكتيريا المفيدة لجسمك، وكمان بديل مثالي للسكر.
حطي المكسرات وقلبيها لحد ما تتغطى كلها بالعسل. ولو نفسك في حاجة منعشة تكسر الحلاوة اللي في المكسرات ممكن تزودي مشمش مجفف أو توت بري، وبعدين سيبي كل ده في التلاجة لمدة ساعة على الأقل. حاولي متزوديش العسل أوي عشان تحافظي على كمية معقولة من السعرات الحرارية. وبعد ما تخلصي بقى حطي كل ده في برطمان صغير على ذوقك ومعاه معلقة وانطلقي للعالم الخارجي وانتي مأمنة نفسك من أي جوع.
مضايقاكي الوصفات دي ونفسك في حاجة أتقل شوية وحلوة بس برضو صحية؟ يبقى أكيد الوصفة الجاية دي هتعجبك عشان هي عبارة عن بسكويت التفاح بزبدة الفول السوداني بس من غير عجينة – أيوة زي ما بنقوللك كدة، من غير الدقيق والسكر والملح كمان. يلا اكتبي معانا.
بسكويت التفاح بزبدة الفول السوداني
المقادير:
-- شرائح تفاح من اختيارك (أحمر أو أخضر)
-- زبدة الفول السوداني
-- قطع الشوكولاتة الداكنة
-- زبيب ومكسرات (اختياري)
جيبي تفاحة أو اتنين وقطعيهم لشرائح مدورة، وادهني مش أكتر من معلقة صغيرة من زبدة الفول السوداني على كل شريحة. بعدين رشي شوية زبيب وقطع الشوكولاتة، ومتنسيش المكسرات كمان لو عايزة، وبس كدة!
الشوكولاتة الداكنة دي هتظبط مزاجك وتعدللك ضغط الدم ومستويات السكر في جسمك.
إيه رأيك في الوجبة دي كبديل للقهوة ليكي على الفطار؟ هتكوني شيلتي الكافيين المضر والملئ بالحوامض بس هتاخدي طاقتك من زبدة الفول السوداني والشوكولاتة الداكنة، والكربوهايدرات المفيدة اللي في التفاح هتغذيكي.
مين قال إن البسكويت استحالة يكون صحي ومفيد؟
بودينج بذور الشيا مع الفاكهة
المقادير:
-- ١/٢ إلى ٣/٤ مقدار من بذور الشيا
-- ٣ أكواب من حليب اللوز
-- ١-٣ معالق كبيرة عسل
الإضافات المقترحة:
-- جرانولا
-- فاكهة طازجة (توت، وشرائح تفاح، وأناناس، وخوخ، وكيوي)
-- رقائق جوز الهند
-- شراب القيقب النقي
-- قرفة
-- مكسرات وبذور
أكلة كمان مش متقدرة كويس هي بذور الشيا مع إنها مليانة أوميجا-٣ وألياف بتديكي طاقة مهولة، ده غير فوائد تانية كتير منها إنها بتحسن حالة بشرتك، وبتساعد قلبك وجهازك الهضمي، وكمان بتقلل علامات التقدم في السن.
قلِّبي معالق العسل في لبن اللوز وزودي بذور الشيا، بعدين حطيهم مع بعض في برطمان وقلبيهم بعد عشر دقايق عشان ميكلكعوش. سيبي البودينج في التلاجة لمدة ٣ ساعات (أو يبقى أحسن لو طول الليل) لحد ما تلاحظي شكله بيتماسك شوية. وأخيراً حطي لمسة منعشة ومسلية من الإضافات زي قطع الفاكهة مثلا وبالهنا والشفا!
عصيان البطاطا المخبوزة
المقادير:
-- ٥ بطاطا متقشرة ومتقطعة
-- زيت زيتون
-- إكليل الجبل (روزماري)
للتتبيل:
-- مقدار ملح البحر
-- ١/٤ كوب فلفل
-- ١/٢ معلقة بابريكا
-- ١/٤ كوب بودرة ثوم
وجبة مثالية مستحيل تزعلي من أكلها وبالعكس دي بديل تحفة للبطاطس المحمرة عشان مفيدة جداً وخفيفة كمان، وتنفع مع غموس الزبادي أو الحمص! بس متنسيش تتبليهم بالملح والـ"روزماري".
افردي ورق زبدة على صينية الفرن، وفي طبق غويط حطي زيت الزيتون والتتبيلة واخلطيهم ببعض. بعدين حطي صوابع البطاطا واتأكدي انهم اتغطوا كويس بالتتبيلة، ووزعيهم بعد كدة على ورق الزبدة واخبزيهم في الفرن لمدة ٢٠ دقيقة لحد ما يبقوا مقرمشين ولونهم ذهبي على بني حلو.
